W cyklu "Klasyka po śląsku" tym razem proponuję równie zabawną historyjkę o osobliwych przygodach pary przyjaciół: Ynsta i Achima oraz rozważania na temat co by było, "Kejbych mioł jedynoście hutów". Jak zawsze życzę wszystkim miłej zabawy!

YNST I ACHIM

(oryg. "Prot i Filip" - J. Brzechwa)

Ynst i Achim, choć niy braty,

To nojlepsze dwa kamraty.

Do roboty się naimać

Ynst niy pódzie bez Achima,

Niy łostawi Achim Ynsta,

Nowet kej mu grozi zymsta;

Achim nikej sie niy boi -

Wiy, co Ynst durś przi nim stoi.

Ino Ynsta chyci ryma,

Już przy Ynście mosz Achima,

Wszyjske znajom łobroz czynsty:

Ynst z Achimym, Achim z Ynstym.

Ale czasym kamracynie

Ciynżkie je, kej dziyń po brynie.

Achim w krałzie mioł goldfisze,

Ynst je wyciep do wasztisza,

I w galyrcie powyżyroł.

Achim srogo mo zożyra,

Za fiszami w dóma sznupie,

Ynst sie ino w gowa klupie:

„Ach Achimie, ach, Achimie,

Ciebie wic się blank nie trzimie!”

Warził Achim roz bachory.

Ynst zarozki na szpas chory,

Znaloz konsek guminioka,

I mu podciepł do litroka.

Achim szuko, chałpa schronio -

Łobiod sztyjc guminym wónio!

Achim wajo i jamruje,

Ynst się lacho i błoznuje:

„Ach, Achimie, ach, Achimie,

Ciebie wic sie blank niy trzimie!”

Achim roz po z Rajchu ciotce

Erbnoł zesel we pozłotce,

W izbie go na micie trzimoł,

Nikt takigo zesla ni mioł.

Ynsta mierził mebel drogi,

Rzaznoł w zeslu wszyjske nogi,

I tak godo: „Kamraciku,

Zicnijże sie w tym zesliku!”

Achim zicnył. Jak nie liźnie,

Zesel pod nim jak nie piźnie,

Sztyry nogi - w sztyry strony!

Wstowo Achim ganc ajchniony:

„Fto to srobiół?” – fest larmuje;

Ynst łod lachów niy szczimuje:

„Ach, Achimie, ach, Achimie,

Ciebie wic sie blank nie trzimie!”

Tukej Achim skiż wnerwiynio

Doś mioł tygo kamracynio:

„Kej tak przajesz dycki zgobiać,

Łoroz jo szpas dlo Cia zrobia!”

Tóż za kudły Ynsta chyciół,

I nakopoł mu do rzici,

Wyłonaczół sroge hiby;

W kóńcu wyczas Ynstem szyby,

Aże bechnoł do marasu,

I ganc straciół chynć do szpasu.

KEJBYCH MIOŁ JEDYNOŚCIE HUTÓW

(oryg. "Gdybym miał jedenaście kapeluszy" - K.I. Gałczyński)

 Kejbych mioł jedynoście hutów,

Piyrszy schowołbych w szranku wele butów.

Drugi wysłołbych pocztom w pakecie do Pszczyny,

 Czeci bych mioł na roztomajte drobaczyny.

Czworty – na fizmatynta,

Pionty – na mojo rynta.

Szósty hut bółby dlo Ryjzy,

Siódmy do przikrywanio hałskyjzy.

Z ósmego bych złonaczył deklik do kronlojchtera

W dziewiontym cichtowołbych jeża abo hamstera.

Dziesionty jedyn gizd by mi uszczelół z gabli

A jedynosty by mi kradzioki chabli.

Bo pedziała o mie jedno rajcula z Chorzowa:

To niy ma gowa na hut! To je tako gryfno gowa!

 Wiersze: Krzysztof Woźniak

Grafika: J. Skrzypek

(ciąg dalszy nastąpi)

Zapraszam do lektury innych artykułów na mym blogu!