Gwiazdka nieaktywnaGwiazdka nieaktywnaGwiazdka nieaktywnaGwiazdka nieaktywnaGwiazdka nieaktywna
 

Po dłuższej przerwie powraca "Klasyka po śląsku". Piąty odcinek cyklu opowiada o tym, jak to słynny pan Hilary szukoł swoich breli, a także o mrożących krew w żyłach wyczynach nie mniej sławnego Sztefka Burczymuchy. Miłej lektury i jeszcze milszej zabawy!

BRELE

(oryg. "Okulary" - J. Tuwim)

 

Pon Hilary w chałpie miele:

Dre sie: „Kaj som moje brele!”

W kożdo kapsa sie kukruje,

Mantel, westa łobmacuje,

 

Wszyjsko z szranku wykiprowoł:

„Fto mi moje brele schowoł?”

Zgiździł babie dauerwele:

„Mosz tam możno moje brele?”

Sznupie w fasce - tyj po biyrze

I w szłapiczce, i w klawiyrze,

 

Pod szeslongiym, na szeslongu,

I w kachloku, i w szpilongu;

Rozfandzolił już lodówka,

Już łodrywać chce delówka,

Łoroz - w zdrzadło sie zezuje:

To niyprowda! Zajś kukruje,

Znodł! I fuczy: „Ty gupolu,

Tyś je sztyjc mioł na kicholu!”

SZTEFEK BURCZYMUCHA

(oryg. "Stefek Burczymucha" - M. Konopnicka)

Roz, kyns wiynkszy łod koprucha,

Boł buks - Sztefek Burczymucha.

- Jo nikogo sie niy boja!

Przed niedźwiedziym twardo stoja,

I mom tela łopowogi,

Co bykowi trzimia rogi!

Wolfów stado fatra brzitwom

Na sto konsków jo wypitwom,

Łoroz pizna leoparda,

Chyca ino ópy barda!

A pantery i tigery

To som dlo mie ino bery!

Lew mi żodyn niy podskoczy -

Z luftgiwery miyndzy łoczy

Cylna jakech szczyloł w Rudzie

Na łodpuście we szisbudzie!

A z szakala abo wolfa

Myńszy przeca pies łod Rolfa!

Komu zechca, spuszcza banie;

A ze szifu w ocyanie

Ino skokna w głymboczyny -

Łoroz chyca dwa rekiny!

I choć suchać się już mierzi,

Chwolno rzić na rond sie herzi.

Roz, kej dali mu śniodanie,

Buks sie kimnył kajś na sianie.

 

Kej łocucnoł – strach go biere,

Bo mu zwiyrz śniodanie żere!

Jak niy serwie się na nogi,

Jak nie czympnie na ty bogi,

Gzuje wartko choby fliger:

- Tiger, fater! -  wreszczy -Tiger!

- Tiger? U nos?  - fater pyto.

- Ach, lew możno! Już mie chytoł;

Kejbych łoroz mu nie pitnoł,

Małowiela by mie złyknoł!

 

Na dwa metry bydzie srogi!

Wielgo paszcza mo i rogi…

- Kaj to boło?

- Tam na sianie!

- Prawie chabnoł mi śniodanie!

Fater z familijom całom

Idom, paczom… a tu mało

Myszka w sianie zicła sobie

I zombkoma kyjza szkrobie!...

 

 Wiersze: Krzysztof Woźniak

Grafika: Jerzy Flisak, Przemysław Liput

(ciąg dalszy nastąpi)

Zapraszam do lektury innych artykułów na mym blogu!

Krzysztof Woźniak Va 1975

Komentarze obsługiwane przez CComment